மட்டு. ஏறாவூரில் காணாமல் போனவர் எலும்புக்கூடாக மீட்பு

[ வெள்ளிக்கிழமை, 10 யூன் 2011, 12:49.18 PM GMT ]

கடந்த ஜனவரி மாதம் 8ம் திகதி மட்டக்களப்பு மாவட்டத்தின் ஏறாவூர் பொலிஸ் பிரிவுக்குட்பட்ட தளவாய், மதுரங்காட்டுப் பகுதியில் வெள்ளம் காரணமாக காணாமல்போன நபர் ஒருவர் இன்று எலும்புக்கூடாக மீட்கப்பட்டுள்ளார். 

இவ்வாறு மீட்கப்பட்ட எலும்புக்கூடு ஏறாவூர், தளவாய் பகுதியைச் சேர்ந்த தியாகராசா சந்திரமோகன் (வயது 29)  என்பவருடையது என அடையாளம் காணப்பட்டுள்ளது. 

இன்று வெள்ளக்கிழமை காலை இப்பகுதிக்கு விறகு எடுக்கச் சென்றவர்கள் மேற்படி எலும்புக்கூட்டினைக் கண்டு பொலிஸாருக்கு வழங்கிய தகவலை அடுத்தே அவை மீட்கப்பட்டுள்ளன. 

குறித்த நபர் கடைசியாக அணிந்திருந்த கறுப்பு நிற ரீ சேட்டினை வைத்தே அவரது சிறிய தாயாரினால் அடையாளம் காட்டப்பட்டுள்ளது என ஏறாவூர் பொலிஸார் தெரிவித்தனர். 

கடந்த ஜனவரி மாதம் 8ஆம் திகதி வெள்ளம் காரணமாக மேற்படி நபர் காணமல் போன நிலையில் இது தொடர்பில் அதற்கு மறுதினம் ஏறாவூர் பொலிஸில் உறவினர்களினால் முறைப்பாடு செய்யப்பட்டிருந்தது.

சம்பவ இடத்திற்கு மட்டக்களப்பு நீதிவான் நீதிமன்ற பதில் நீதிபதி வீ.எம்.ஸியான் நேரில் சென்று மரண விசாரணைகளை மேற்கொண்டார்.